يااللي غيابك طال وبحقي اخطيت
هذا شهر .. ما شوف للوصل نيه .؟
هن كانت اسبوعين لكن .. تماديت
في غيبتك .... كنك موصى وصيه
لعبت باعصابي ... ولا قلت مليت
لا راح يوم ... اقول : باكر .. مجيه
الله ياني في غيابك ... تحريت
اثر المفارق صعب .. ماهو شويه
عقبك مشاويري من البيت للبيت
اخاف ... لا دقيت ... ماني هنيه
عانيت انا في غيبتك حيل عانيت
يا بغضني .. للبعد .. لارحم حيه
هذا شهر وش عاد لو انك ابطيت
والله ان تلقى لك .. هنيّا ضحيه
البارحه مابين .. يمكن .. ويا ليت
وابليس يتركني .... ويرجع عليّه
فكرت .. لو طوّل غيابك ولا جيت
يعني كذا .. روحه ومن غير جيه
خانتني الدمعه وطاحت وصديت
ملعون ابو التفكير ... يذبح خويه